خاک کو میں خوار کیوں کرتا — شارق کیفی
شاعر
خاک کو میں خوار کیوں کرتا
دعائے خیر سے
دعائے مغفرت تک کا سفر پورا ہوا
اور اب میں اپنی قبر میں ہوں
ذرا حیرت زدہ ہوں
مگر یہ قبر اتنی تنگ بالکل بھی نہیں ہے
میں جیسی سوچتا تھا
مجھے بس عطر اور کافور کی خوشبو پریشاں کر رہی ہے
اور کچھ حد تک یہ ڈورے آنکھ کے
اندھیرا ہے مگر وہ بھی نہایت مہرباں
دل رکھنے والا
بہت مانوس سا لگتا ہے سب کچھ
کچھ ایسا
جیسے کوئی اپنی ماں کی کوکھ میں پھر لوٹ آیا ہو
وہاں اوپر بھی کچھ ہلچل ہے اب تک
ابھی تک لوگ مٹی دے رہے ہیں جسم کو میرے
یہ آوازیں بھی آئی ہیں
برائے مہربانی اپنے جوتے کھول لیجے
یہ مٹی قبر کی ہے اس کی حرمت کو سمجھئے
افسردہ ہو گیا ہوں میں یہ سن کر
اگر یہ بات میں نے زندگی میں جان لی ہوتی
کہ بس صورت بدل لینے سے مٹی پاک ہو سکتی ہے میری
تو اپنی خاک کو میں خوار کیوں کرتا
میں اتنا زندگی سے پیار کیوں کرتا
شارق کیفی
KHak ko main KHwar kyun karta
duā-e-ḳhair se
duā-e-maġhfirat tak kā safar puurā huā
aur ab maiñ apnī qabr meñ huuñ
zarā hairat-zada huuñ
magar ye qabr itnī tañg bilkul bhī nahīñ hai
maiñ jaisī sochtā thā
mujhe bas itr aur kāfūr kī ḳhushbū pareshāñ kar rahī hai
aur kuchh had tak ye Dore aañkh ke
añdherā hai magar vo bhī nihāyat mehrbāñ
dil rakhne vaalā
bahut mānūs sā lagtā hai sab kuchh
kuchh aisā
jaise koī apnī maañ kī kokh meñ phir lauT aayā ho
vahāñ uupar bhī kuchh halchal hai ab tak
abhī tak log miTTī de rahe haiñ jism ko mere
ye āvāzeñ bhī aa.ī haiñ
barā-e-mehrbānī apne juute khol liije
ye miTTī qabr kī hai is kī hurmat ko samajhiye
afsurda ho gayā huuñ maiñ ye sun kar
agar ye baat maiñ ne zindagī meñ jaan lī hotī
ki bas sūrat badal lene se miTTī paak ho saktī hai merī
to apnī ḳhaak ko maiñ ḳhvār kyuuñ kartā
maiñ itnā zindagī se pyaar kyuuñ kartā
شاعر کے بارے میں
شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...
مکمل تعارف پڑھیں