کھلونا موت بھی ہے — شارق کیفی
شاعر
کھلونا موت بھی ہے
مرے جسم کے پینتروں سے پریشاں تھی وہ
میں نے سمجھانا چاہا اسے
خدا جانتا ہے
کہ رتی برابر مجھے اور جینے کی خواہش نہیں
سچ تو یہ ہے
ایسے مہمان سے منہ چھپانا
کہ جو صرف میرے لئے آسمانوں سے آیا ہو
شرمندہ کرتا ہے مجھ کو
بھلا ایک انساں کے بس میں کہاں موت کو چھیڑنا
میں تو ڈرتا ہوں تم سے
یہ کوئی اور ہے جو مرے سرد پیروں کو پھر گرم کر کے
تمہیں چھیڑتا ہے
مرے گھر کے چکر لگانے پہ مجبور کرتا ہے
مگر وہ سسکتی رہی
اپنے پیروں کے چھالوں کو روتی رہی
اور میں حیرت زدہ سوچنے پر یہ مجبور تھا
کیا مری موت بھی
میرے مرنے کے دن
میری سانسوں کی گنتی کے بارے میں اتنی ہی انجان ہے
جتنا میں
شارق کیفی
khilauna maut bhi hai
mire jism ke paiñtraoñ se pareshāñ thī vo
maiñ ne samjhānā chāhā use
ḳhudā jāntā hai
ki rattī barābar mujhe aur jiine kī ḳhvāhish nahīñ
sach to ye hai
aise mehmān se muñh chhupānā
ki jo sirf mere liye āsmānoñ se aayā ho
sharminda kartā hai mujh ko
bhalā ek insāñ ke bas meñ kahāñ maut ko chheḌnā
maiñ to Dartā huuñ tum se
ye koī aur hai jo mire sard pairoñ ko phir garm kar ke
tumheñ chheḌtā hai
mire ghar ke chakkar lagāne pe majbūr kartā hai
magar vo sisaktī rahī
apne pairoñ ke chhāloñ ko rotī rahī
aur maiñ hairat-zada sochne par ye majbūr thā
kyā mirī maut bhī
mere marne ke din
merī sāñsoñ kī gintī ke baare meñ utnī hī anjān hai
jitnā maiñ
شاعر کے بارے میں
شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...
مکمل تعارف پڑھیں