کسی کے سمجھ دار ہونے تک — شارق کیفی
شاعر
کسی کے سمجھ دار ہونے تک
قبر کیا ڈھونڈنا
مٹ گئے ہوں گے اس کے نشاں
کہیں بھی جلا کر لگا دوں اگربتیاں
مدتوں بعد بھی
ورد کرتے ہوئے سورۂ فاتحہ کا وہی گونج کانوں میں ہے
ترا باپ کیا روز پیتا ہے
اف
وہ جو شرمندگی کا سبب ہو بھلا اس سے کیسی محبت
اور ویسے بھی
ایک بچہ کی نفرت سے سچا کوئی اور جذبہ نہیں
دفن کے وقت بھی تو میں دل میں کہیں ان سے ناراض تھا
مگر آج خود جب میں اس عمر میں ہوں
جو پاپا کی شاید رہی ہوگی تب
جب میں روٹھا تھا ان سے
مرے دل میں احساس جرم اور شرمندگی کے سوا کچھ نہیں
آپ سن تو رہے ہیں نہ پاپا
معافی مجھے چاہئے
کیا یہ ممکن ہے
پھر خود سے کہتا ہوں شاید نہیں
وہ گئے
کوئی رکتا نہیں ہے کسی کے سمجھ دار ہونے تلک
سچ کی تہہ میں اترنے کے لائق گنہ گار ہونے تلک
شارق کیفی
kisi ke samajhdar hone tak
qabr kyā DhūñDnā
miT ga.e hoñge us ke nishāñ
kahīñ bhī jalā kar lagā duuñ agarbattiyāñ
muddatoñ baa'd bhī
vird karte hue sūra-e-fātiha kā vahī guuñj kānoñ meñ hai
tirā baap kyā roz piitā hai
uf
vo jo sharmindagī kā sabab ho bhalā us se kaisī mohabbat
aur vaise bhī
ek bachche kī nafrat se sachchā koī aur jazba nahīñ
dafn ke vaqt bhī to maiñ dil meñ kahīñ un se nārāz thā
magar aaj ḳhud jab maiñ us 'umr meñ huuñ
jo paapā kī shāyad rahī hogī tab
jab maiñ rūThā thā un se
mire dil meñ ehsās-e-jurm aur sharmindagī ke sivā kuchh nahīñ
aap sun to rahe haiñ na paapā
mu'āfī mujhe chāhiye
kyā ye mumkin hai
phir ḳhud se kahtā huuñ shāyad nahīñ
vo ga.e
koī ruktā nahīñ hai kisī ke samajhdār hone talak
sach kī tah meñ utarne ke laa.iq gunahgār hone talak
شاعر کے بارے میں
شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...
مکمل تعارف پڑھیں