ماحول بنانے والے جملے — شارق کیفی
شاعر
ماحول بنانے والے جملے
آدھا سگریٹ پی کر پھینک دیا میں نے
اس کے حصے کا
جس کے غم میں سنتا ہوں
دنیا کو میں نے چھوڑ دیا
اور میں خاموشی سے بیٹھا سوچ رہا ہوں
یہ دنیا بھی کون سی دنیا میں جیتی ہے
دنیا چھوڑ دی میں نے
اور خود مجھ کو یہ معلوم نہیں ہے
یہ بھی سننے میں آیا ہے
جب سے اس کی موت ہوئی ہے
گم صم ہوں میں
دور خلا میں جانے کیا تکتا رہتا ہوں
دور خلا میں تکنا کیا اچھا جملہ ہے
مجھ کو بھی اچھا لگتا ہے
کہنے والوں کو تو اور زیادہ اچھا لگتا ہوگا
جھوٹ ہے سب کچھ
لیکن کیوں تردید کروں میں
یہی تو وہ جملے ہیں جو ماحول بنائے رکھتے ہیں کچھ
ورنہ سچی بات تو یہ ہے
کوشش کر کے آنکھوں کو نم رکھنا
شیو بڑھائے رکھنا
یہ بھی ایک طرح کا سکھ ہے
مجھے تو اس کی موت سے بڑھ کر
اس کے غم کی موت کا دکھ ہے
شارق کیفی
mahaul banane wale jumle
aadhā cigarette pī kar pheñk diyā maiñ ne
us ke hisse kā
jis ke ġham meñ suntā huuñ
duniyā ko maiñ ne chhoḌ diyā
aur maiñ ḳhāmoshī se baiThā soch rahā huuñ
ye duniyā bhī kaun sī duniyā meñ jiitī hai
duniyā chhoḌ dī maiñ ne
aur ḳhud mujh ko ye mā'lūm nahīñ hai
ye bhī sunñe meñ aayā hai
jab se us kī maut huī hai
gum-sum huuñ maiñ
duur ḳhalā meñ jaane kyā taktā rahtā huuñ
duur ḳhalā meñ taknā kyā achchhā jumla hai
mujh ko bhī achchhā lagtā hai
kahne vāloñ ko to aur ziyāda achchhā lagtā hogā
jhuuT hai sab kuchh
lekin kyoñ tardīd karūñ maiñ
yahī to vo jumle haiñ jo māhaul banā.e rakhte haiñ kuchh
varna sachchī baat to ye hai
koshish kar ke āñkhoñ ko nam rakhnā
shave baḌhā.e rakhnā
ye bhī ek tarah kā sukh hai
mujhe to us kī maut se baḌh kar
us ke ġham kī maut kā dukh hai
شاعر کے بارے میں
شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...
مکمل تعارف پڑھیں