مرنے والے سے جلن — شارق کیفی
شاعر
مرنے والے سے جلن
ذرا سا غم نہیں چہرے پہ ان کے
میاں سر پر کوئی رومال ہی رکھ لو
انہیں تو موت آنا ہی نہیں ہے
وہی طعنے
وہی فقرے
ابھی تک میرا پیچھا کر رہے ہیں ہر جنازے میں
میں اپنی چال کی رفتار تھوڑی اور کم کر کے
نکل آتا ہوں باہر بھیڑ سے
اور رک کے اک دکان پر سگریٹ جلاتا ہوں
جنازہ دور ہوتا جا رہا ہے
یہ سب کیا ہے؟
اداکاری نہیں آتی مجھے تو کیا کروں میں
اور سچی بات کہہ دوں تو مجھے پاگل سمجھ لے گی یہ دنیا
ہاں یہ سچ ہے
مجھے رتی برابر غم نہیں ہوتا کسی کی موت کا
اور یہ بھی سن لو
مری جس مسکراہٹ پر یہاں ناراض ہیں سب
سبب اس کا جلن ہے
جو میں محسوس کرتا ہوں کسی بھی مرنے والے سے
کڑھن ہوتی ہے مجھ کو سوچ کر
کہ میں جس امتحاں کے خوف سے بے حال اور بے چپن پھرتا ہوں
وہ یہ صاحب
جو کاندھوں پر ہیں
ان کا ہو چکا
اور میرا باقی ہے
شارق کیفی
marne wale se jalan
zarā sā ġham nahīñ chehre pe in ke
miyāñ sar par koī rūmāl hī rakh lo
inheñ to maut aanā hī nahīñ hai
vahī ta.ane
vahī fiqre
abhī tak merā pīchhā kar rahe haiñ har janāze meñ
maiñ apnī chaal kī raftār thoḌī aur kam kar ke
nikal aatā huuñ bāhar bhiiḌ se
aur ruk ke ik dukān par cigarette jalātā huuñ
janāza duur hotā jā rahā hai
ye sab kyā hai?
adākārī nahīñ aatī mujhe to kyā karūñ maiñ
aur sachchī baat kah duuñ to mujhe pāgal samajh legī ye duniyā
haañ ye sach hai
mujhe rattī barābar ġham nahīñ hotā kisī kī maut kā
aur ye bhī sun lo
mirī jis muskurāhaT par yahāñ nārāz haiñ sab
sabab is kā jalan hai
jo maiñ mahsūs kartā huuñ kisī bhī marne vaale se
kuḌhan hotī hai mujh ko soch kar
ki maiñ jis imtihāñ ke ḳhauf se behāl aur be-chain phirtā huuñ
vo ye sāhab
jo kāñdhoñ par haiñ
un kā ho chukā
aur merā baaqī hai
شاعر کے بارے میں
شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...
مکمل تعارف پڑھیں