مضحکہ خیز یہ کردار ہوا جاتا ہے — شارق کیفی
شاعر
مضحکہ خیز یہ کردار ہوا جاتا ہے
مضحکہ خیز یہ کردار ہوا جاتا ہے
وہ جو عاشق تھا اداکار ہوا جاتا ہے
گفتگو کر کے پریشاں ہوں کہ لہجے میں ترے
وہ کھلا پن ہے کہ دیوار ہوا جاتا ہے
کھیل ہے اس کے لیے ترک تعلق کا خیال
اور کوئی سوچ کے بیمار ہوا جاتا ہے
فرق اتنا تو پڑا ہے کہ ملاقات کے دن
اب ذرا دیر سے تیار ہوا جاتا ہے
ایک ہی جیسے ہیں ہم سب کے مسائل شاید
میرا غم سب کا سروکار ہوا جاتا ہے
ہم تو لہروں سے فقط کھیلنے آئے تھے یہاں
اور سمندر ہے کہ بیدار ہوا جاتا ہے
نیند پر جتنے کڑے پہرے لگاتا ہوں میں
خواب کا راستہ ہموار ہوا جاتا ہے
شارق کیفی
mazhaka-KHez ye kirdar hua jata hai
maz.haka-ḳhez ye kirdār huā jaatā hai
vo jo 'āshiq thā adākār huā jaatā hai
guftugū kar ke pareshāñ huuñ ki lahje meñ tire
vo khulā-pan hai ki dīvār huā jaatā hai
khel hai us ke liye tark-e-ta'alluq kā ḳhayāl
aur koī soch ke bīmār huā jaatā hai
farq itnā to paḌā hai ki mulāqāt ke din
ab zarā der se tayyār huā jaatā hai
ek hī jaise haiñ ham sab ke masā.il shāyad
merā ġham sab kā sarokār huā jaatā hai
ham to lahroñ se faqat khelne aa.e the yahāñ
aur samundar hai ki bedār huā jaatā hai
niiñd par jitne kaḌe pahre lagātā huuñ maiñ
ḳhvāb kā rāsta hamvār huā jaatā hai
شاعر کے بارے میں
شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...
مکمل تعارف پڑھیں