پہلی بار وہ خط لکھا تھا — شارق کیفی
شاعر
پہلی بار وہ خط لکھا تھا
پہلی بار وہ خط لکھا تھا
جس کا جواب بھی آ سکتا تھا
خود افواہ اڑاتا تھا میں
خود ہی یقیں بھی کر لیتا تھا
اس سے کہو اس روپ میں آئے
جیسا پہلی نظر میں لگا تھا
بھول چکا تھا دے کے صدا میں
تب جنگل کا جواب آیا تھا
ہم تو پرائے تھے اس گھر میں
ہم سے کون خفا ہوتا تھا
ٹوٹ گئے اس کوشش میں ہم
اپنی طرف جھکنا چاہا تھا
الجھ رہی تھی آنکھ کہیں پر
کوئی مجھے پہچان رہا تھا
ٹوٹ گیا پھر غم کا نشہ بھی
دکھ کتنا سکھ دے سکتا تھا
جگہ جگہ سے ٹوٹ رہا ہوں
کس نے مجھے چھو کر دیکھا تھا
کتنے سچے دل سے ہم نے
اپنا اپنا جھوٹ کہا تھا
پہلی بار میں اس کی خاطر
اپنے لئے کچھ سوچ رہا تھا
اتنے سمجھانے والے تھے
میں کچھ کیسے سمجھ سکتا تھا
بڑی بڑی آنکھوں میں اس کی
کوئی سوال ہوا کرتا تھا
شارق کیفی
pahli bar wo KHat likkha tha
pahlī baar vo ḳhat likkhā thā
jis kā javāb bhī aa saktā thā
ḳhud afvāh uḌātā thā maiñ
ḳhud hī yaqīñ bhī kar letā thā
us se kaho us ruup meñ aa.e
jaisā pahlī nazar meñ lagā thā
bhuul chukā thā de ke sadā maiñ
tab jañgal kā javāb aayā thā
ham to parā.e the is ghar meñ
ham se kaun ḳhafā hotā thā
TuuT ga.e is koshish meñ ham
apnī taraf jhuknā chāhā thā
ulajh rahī thī aañkh kahīñ par
koī mujhe pahchān rahā thā
TuuT gayā phir ġham kā nasha bhī
dukh kitnā sukh de saktā thā
jagah jagah se TuuT rahā huuñ
kis ne mujhe chhū kar dekhā thā
kitne sachche dil se ham ne
apnā apnā jhuuT kahā thā
pahlī baar maiñ us kī ḳhātir
apne liye kuchh soch rahā thā
itne samjhāne vaale the
maiñ kuchh kaise samajh saktā thā
baḌī baḌī āñkhoñ meñ us kī
koī savāl huā kartā thā
شاعر کے بارے میں
شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...
مکمل تعارف پڑھیں