پھر سے ہم پڑ گئے محبت میں — شارق کیفی
شاعر
پھر سے ہم پڑ گئے محبت میں
پھر سے ہم پڑ گئے محبت میں
تجھ کو رونا نہیں تھا قسمت میں
وہ جو سنجیدگی سے کہنا تھا
وہ تو ہم کہہ چکے شرارت میں
ہوش میں کب ہمارے بس کے تھے
کام نمٹا لیے جو وحشت میں
اک پرانی نماز یاد آئی
اور خلل پڑ گیا عبادت میں
روز میرے لیے قیامت تھی
روز ٹلتی ہوئی قیامت میں
بس وہی مانگنے نہیں آتے
جن کا حصہ ہے میری دولت میں
یاد رکھنا گناہ گار ہو تم
مسکرانا نہیں عدالت میں
آخری جام نے بگاڑی بات
بس نہیں کہہ سکے مروت میں
مسکرا کر وداع کرتا ہوں
یہ بھی اب آ گیا ہے عادت میں
شارق کیفی
phir se hum paD gae mohabbat mein
phir se ham paḌ ga.e mohabbat meñ
tujh ko ronā nahīñ thā qismat meñ
vo jo sanjīdgī se kahnā thā
vo to ham kah chuke sharārat meñ
hosh meñ kab hamāre bas ke the
kaam nimTā liye jo vahshat meñ
ik purānī namāz yaad aa.ī
aur ḳhalal paḌ gayā 'ibādat meñ
roz mere liye qayāmat thī
roz Taltī huī qayāmat meñ
bas vahī māñgne nahīñ aate
jin kā hissa hai merī daulat meñ
yaad rakhnā gunāhgār ho tum
muskurānā nahīñ 'adālat meñ
āḳhirī jaam ne bigāḌī baat
bas nahīñ kah sake muravvat meñ
muskurā kar vidā' kartā huuñ
ye bhī ab aa gayā hai 'ādat meñ
شاعر کے بارے میں
شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...
مکمل تعارف پڑھیں