سفر حالانکہ تیرے ساتھ اچھا چل رہا ہے — شارق کیفی
شاعر
سفر حالانکہ تیرے ساتھ اچھا چل رہا ہے
سفر حالانکہ تیرے ساتھ اچھا چل رہا ہے
برابر سے مگر اک اور رستہ چل رہا ہے
زبانی کھیل بن کر رہ گیا ہے عشق اپنا
جہاں وعدے کے بدلے صرف وعدہ چل رہا ہے
کہاں تک بزم میں بیٹھا رہوں نظریں جھکائے
جدھر دیکھو ادھر کوئی اشارہ چل رہا ہے
ہمیں یہ بیچ جھگڑے میں اچانک یاد آیا
کہ اس کے ساتھ تو جھگڑا ہمارا چل رہا ہے
کبھی بستر سے اٹھے بھی تو یہ چیخیں سنی ہیں
کھلونا چل گیا دیکھو کھلونا چل رہا ہے
ہر اک محفل میں ہوتا تھا نیا انداز اپنا
مگر اب مدتوں سے ایک چہرہ چل رہا ہے
شارق کیفی
safar haalanki tere sath achchha chal raha hai
safar hālāñki tere saath achchhā chal rahā hai
barābar se magar ik aur rasta chal rahā hai
zabānī khel ban kar rah gayā hai 'ishq apnā
jahāñ vā'de ke badle sirf vā'da chal rahā hai
kahāñ tak bazm meñ baiThā rahūñ nazreñ jhukā.e
jidhar dekho udhar koī ishāra chal rahā hai
hameñ ye biich jhagḌe meñ achānak yaad aayā
ki is ke saath to jhagḌā hamārā chal rahā hai
kabhī bistar se uTThe bhī to ye chīḳheñ sunī haiñ
khilaunā chal gayā dekho khilaunā chal rahā hai
har ik mahfil meñ hotā thā nayā andāz apnā
magar ab muddatoñ se ek chehra chal rahā hai
شاعر کے بارے میں
شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...
مکمل تعارف پڑھیں