تری طرف سے تو ہاں مان کر ہی چلنا ہے — شارق کیفی
شاعر
تری طرف سے تو ہاں مان کر ہی چلنا ہے
تری طرف سے تو ہاں مان کر ہی چلنا ہے
کہ سارا کھیل اس امید پر ہی چلنا ہے
قدم ٹھہر ہی گئے ہیں تری گلی میں تو پھر
یہاں سے کوئی دعا مانگ کر ہی چلنا ہے
رہے ہو ساتھ تو کچھ وقت اور دے دو ہمیں
یہاں سے لوٹ کے بس اب تو گھر ہی چلنا ہے
مخالفت پہ ہواؤں کی کیوں پریشاں ہوں
تمہاری سمت اگر عمر بھر ہی چلنا ہے
کوئی امید نہیں کھڑکیوں کو بند کرو
کہ اب تو دشت بلا کا سفر ہی چلنا ہے
ذرا سا قرب میسر تو آئے اس کا مجھے
کہ اس کے بعد زباں کا ہنر ہی چلنا ہے
شارق کیفی
teri taraf se to han man kar hi chalna hai
tirī taraf se to haañ maan kar hī chalnā hai
ki saarā khel is ummīd par hī chalnā hai
qadam Thahar hī ga.e haiñ tirī galī meñ to phir
yahāñ se koī du'ā maañg kar hī chalnā hai
rahe ho saath to kuchh vaqt aur de do hameñ
yahāñ se lauT ke bas ab to ghar hī chalnā hai
muḳhālifat pe havāoñ kī kyoñ pareshāñ hoñ
tumhārī samt agar 'umr-bhar hī chalnā hai
koī umiid nahīñ khiḌkiyoñ ko band karo
ki ab to dasht-e-balā kā safar hī chalnā hai
zarā sā qurb mayassar to aa.e us kā mujhe
ki us ke baa'd zabāñ kā hunar hī chalnā hai
شاعر کے بارے میں
شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...
مکمل تعارف پڑھیں