ذرا بھی بدلی نہیں جو بھی اس کی عادت تھی — شارق کیفی
شاعر
ذرا بھی بدلی نہیں جو بھی اس کی عادت تھی
ذرا بھی بدلی نہیں جو بھی اس کی عادت تھی
ملا تو آج بھی لہجے میں اجنبیت تھی
وہ دن بھی تھے کہ ان آنکھوں میں اتنی حیرت تھی
تمام بازی گروں کو مری ضرورت تھی
وہ بات سوچ کے میں جس کو مدتوں جیتا
بچھڑتے وقت بتانے کی کیا ضرورت تھی
پتہ نہیں یہ تمنائے قرب کب جاگی
مجھے تو صرف اسے سوچنے کی عادت تھی
خموشیوں نے پریشاں کیا تو ہو گا مگر
پکارنے کی یہی صرف ایک صورت تھی
گئے بھی جان سے اور کوئی مطمئن نہ ہوا
کہ پھر دفاع نہ کرنے کی ہم پہ تہمت تھی
کہیں پہ چوک رہے ہیں یہ آئنے شاید
نہیں تو عکس میں اب تک مری شباہت تھی
ہزار بار اشاروں میں اس کو سمجھایا
مگر اسے تو مرے جھوٹ سے محبت تھی
منا لیا ہے اسے پھر اسی کی شرطوں پر
تمام عمر کسے روٹھنے کی فرصت تھی
ہر اک قدم پہ بہت سوچنا پڑا مجھ کو
کہ امتحاں بھی وہیں تھے جہاں اجازت تھی
یہ اس کی شکل سے کیوں میرے خد و خال ابھرے
اسے بھی فکر بہت تھی مجھے بھی حیرت تھی
شارق کیفی
zara bhi badli nahin jo bhi uski aadat thi
zarā bhī badlī nahīñ jo bhī us kī 'ādat thī
milā to aaj bhī lahje meñ ajnabiyyat thī
vo din bhī the ki in āñkhoñ meñ itnī hairat thī
tamām bāzīgaroñ ko mirī zarūrat thī
vo baat soch ke maiñ jis ko muddatoñ jiitā
bichhaḌte vaqt batāne kī kyā zarūrat thī
pata nahīñ ye tamannā-e-qurb kab jaagī
mujhe to sirf use sochne kī 'ādat thī
ḳhamoshiyoñ ne pareshāñ kiyā to hogā magar
pukārne kī yahī sirf ek sūrat thī
ga.e bhī jaan se aur koī mutma.in na huā
ki phir difā' na karne kī ham pe tohmat thī
kahīñ pe chuuk rahe haiñ ye aa.ine shāyad
nahīñ to 'aks meñ ab tak mirī shabāhat thī
hazār baar ishāroñ meñ us ko samjhāyā
magar use to mire jhūTh se mohabbat thī
manā liyā hai use phir usī kī shartoñ par
tamām 'umr kise rūThne kī fursat thī
har ik qadam pe bahut sochnā paḌā mujh ko
ki imtihāñ bhī vahīñ the jahāñ ijāzat thī
ye us kī shakl se kyoñ mere ḳhadd-o-ḳhāl ubhre
use bhī fikr bahut thī mujhe bhī hairat thī
شاعر کے بارے میں
شارق کیفی عہدِ حاضر کے اہم اردو شعرا میں شمار ہوتے ہیں جنہوں نے اپنی منفرد فکری بصیرت، سادہ مگر پُراثر اسلوب اور عصری شعور کے باعث ادبی دنیا میں نمایاں مقام حاصل کیا۔ 1961ء میں بریلی، اتر پردیش میں پیدا ہونے والے شارق کیفی کو ادبی ذوق اپنے خاندانی ماحول سے وراثت میں ملا۔ ان کے والد کیفی وجدانی (سید رفاقت حسین) خود ایک معتبر شاعر تھے، چنانچہ شعری...
مکمل تعارف پڑھیں