آنکھ میں جلوہ ترا دل میں تری یاد رہے — وحشت رضا علی
شاعر
آنکھ میں جلوہ ترا دل میں تری یاد رہے
آنکھ میں جلوہ ترا دل میں تری یاد رہے
یہ میسر ہو تو پھر کیوں کوئی ناشاد رہے
اس زمانے میں خموشی سے نکلتا نہیں کام
نالہ پر شور ہو اور زوروں پہ فریاد رہے
درد کا کچھ تو ہو احساس دل انساں میں
سخت ناشاد ہے دائم جو یہاں شاد رہے
اے ترے دام محبت کے دل و جاں صدقے
شکر ہے قید علائق سے ہم آزاد رہے
نالہ ایسا ہو کہ ہو اس پہ گمان نغمہ
رہے اس طرح اگر شکوۂ بیداد رہے
ہر طرف دام بچھائے ہیں ہوس نے کیا کیا
کیا یہ ممکن ہے یہاں کوئی دل آزاد رہے
جب یہ عالم ہو کہ منڈلاتی ہو ہر سمت کو برق
کیوں کوئی نوحہ گر خرمن برباد رہے
اب تصور میں کہاں شکل تمنا وحشتؔ
جس کو مدت سے نہ دیکھا ہو وہ کیا یاد رہے
وحشتؔ رضا علی
Aankh mein jalwa tera dil mein teri yaad rahe
Aankh mein jalwa tera dil mein teri yaad rahe
Yeh mayassar ho to phir kyun koi nashad rahe
Is zamane mein khamoshi se nikalta nahin kaam
Nala pur shor ho aur zoron pe faryad rahe
Dard ka kuch to ho ehsaas dil-e-insan mein
Sakht nashad hai dayam jo yahan shad rahe
Aye tere daam-e-mohabbat ke dil-o-jaan sadqe
Shukr hai qaid-e-alaaiq se hum azad rahe
Nala aisa ho ke ho us pe gumaan-e-naghma
Rahe is tarah agar shikwa-e-bedaad rahe
Har taraf daam bichhaye hain hawas ne kya kya
Kya yeh mumkin hai yahan koi dil azad rahe
Jab yeh alam ho ke mandlati ho har samt ko barq
Kyun koi nauha gar khirman-e-barbaad rahe
Ab tasavvur mein kahan shakl-e-tamanna Wahshat
Jis ko muddat se na dekha ho woh kya yaad rahe
شاعر کے بارے میں
وحشت رضا علی کلکتوی اردو کے ممتاز شاعر، ادیب، نقاد اور استادِ سخن تھے جن کا اصل نام سید رضا علی تھا جبکہ “وحشتؔ” ان کا تخلص تھا۔ وہ 18 نومبر 1881ء ...
مکمل تعارف پڑھیں