کیا ہے کہ آج چلتے ہو کترا کے راہ سے — وحشت رضا علی
شاعر
کیا ہے کہ آج چلتے ہو کترا کے راہ سے
کیا ہے کہ آج چلتے ہو کترا کے راہ سے
دیکھو ادھر نگاہ ملا کر نگاہ سے
شرم جفا سے چھپتے ہو تم دادخواہ سے
عذر گنہ تمہارا ہے بدتر گناہ سے
ان کی حیا و شرم نے رکھی ہے دل کی شرم
کیا ہوگا جب نگاہ ملے گی نگاہ سے
انصاف بھی یہی ہے یہی شان حسن بھی
ہاں ہاں نظر چراؤ قتیل نگاہ سے
بیت الصنم سے دور نہیں ہے حرم کی راہ
کیوں راہ پوچھیں زاہد گم کردہ راہ سے
کیوں شکوہ ہم کریں عدم التفات کا
وہ پوچھتے تو ہیں نگہ گاہ گاہ سے
زاہد ہزار حیف کہ پہنچا نہ کوئی فیض
رندوں کے مے کدے کو تری خانقاہ سے
پروانوں کا ہجوم ہے شمع جمال پر
جیتا پھرے گا کون تری جلوہ گاہ سے
شکوہ کروں تمہاری جفا کا تو رو سیاہ
دیکھو نہ تم مجھے نگہ عذر خواہ سے
خوشحالئ رقیب سے وہ شاد شاد ہیں
یعنی ہیں بے خبر مرے حال تباہ سے
گردن جھکی ہوئی ہے اٹھاتے نہیں ہیں سر
ڈر ہے انہیں نگاہ لڑے گی نگاہ سے
نکلا نہ کوئی حیف یہاں قابل شکار
صیاد خالی ہاتھ پھرا صید گاہ سے
ہر چند وحشتؔ اپنی غزل تھی گری ہوئی
محفل سخن کی گونج اٹھی واہ واہ سے
وحشتؔ رضا علی
Kya hai ke aaj chalte ho katra ke raah se
Kya hai ke aaj chalte ho katra ke raah se
Dekho idhar nigaah mila kar nigaah se
Sharm-e-jafa se chhupte ho tum daad-khwah se
Uzr-e-gunah tumhara hai badtar gunaah se
Un ki haya o sharm ne rakhi hai dil ki sharm
Kya hoga jab nigaah milegi nigaah se
Insaaf bhi yehi hai yehi shaan-e-husn bhi
Haan haan nazar churao qateel-e-nigaah se
Bait-ul-sanam se door nahin hai haram ki raah
Kyun raah poochhein zaahid gum karda raah se
Kyun shikwa hum karein adam iltefaat ka
Woh poochhte to hain nigah gaah gaah se
Zaahid hazaar haif ke pahuncha na koi faiz
Rindon ke mai-kade ko teri khanqah se
Parwanon ka hujoom hai shama-e-jamaal par
Jeeta phirega kaun teri jalwa-gah se
Shikwa karun tumhari jafa ka to roo-siyah
Dekho na tum mujhe nigah-e-uzr-khwah se
Khush-haali-e-raqeeb se woh shaad shaad hain
Yaani hain be-khabar mere haal-e-tabah se
Gardan jhuki hui hai uthate nahin hain sar
Dar hai unhein nigaah laregi nigaah se
Nikla na koi haif yahan qaabil-e-shikaar
Sayyad khaali haath phirra said-gah se
Har chand Wahshat apni ghazal thi giri hui
Mahfil-e-sukhan ki goonj uthi wah wah se
شاعر کے بارے میں
وحشت رضا علی کلکتوی اردو کے ممتاز شاعر، ادیب، نقاد اور استادِ سخن تھے جن کا اصل نام سید رضا علی تھا جبکہ “وحشتؔ” ان کا تخلص تھا۔ وہ 18 نومبر 1881ء ...
مکمل تعارف پڑھیں