تیر نظر نے ظلم کو احساں بنا دیا — وحشت رضا علی
شاعر
تیر نظر نے ظلم کو احساں بنا دیا
تیر نظر نے ظلم کو احساں بنا دیا
ترکیب دل نے درد کو درماں بنا دیا
صد شکر آج ہو گئی تکمیل عشق کی
اپنے کو خاک کوچۂ جاناں بنا دیا
کوتاہی کوئی دست جنوں سے نہیں ہوئی
دامن کو ہم کنار گریباں بنا دیا
چھوڑی ہے جب سے میں نے سلامت روی کی چال
دشواریوں کو راہ کی آساں بنا دیا
اے مشعل امید یہ احسان کم نہیں
تاریک شب کو تو نے درخشاں بنا دیا
حسن آفریں ہوا ہے تصور جمال کا
دل کو ہوائے گل نے گلستاں بنا دیا
زہد اور اتقا پہ مجھے اپنے ناز تھا
خود میں نے تجھ کو دشمن ایماں بنا دیا
آئینۂ جمال کو دیکھوں گا کس طرح
اس نے تو پہلے ہی مجھے حیراں بنا دیا
وہ امتیاز حسن ہے معنی و لفظ کا
وحشتؔ کو جس نے غالبؔ دوراں بنا دیا
وحشتؔ رضا علی
Teer-e-nazar ne zulm ko ehsaan bana diya
Teer-e-nazar ne zulm ko ehsaan bana diya
Tarkeeb-e-dil ne dard ko darmaan bana diya
Sad shukr aaj ho gayi takmeel-e-ishq ki
Apne ko khaak-e-koocha-e-jaanaan bana diya
Kootaahi koi dast-e-junoon se nahin hui
Daaman ko hum-kinaar-e-girebaan bana diya
Chhori hai jab se main ne salaamat-ravi ki chaal
Dushwariyon ko raah ki aasaan bana diya
Ae mash'al-e-ummeed yeh ehsaan kam nahin
Tareek shab ko tu ne darakhshaan bana diya
Husn aafreen hua hai tasavvur-e-jamaal ka
Dil ko hawa-e-gul ne gulistaan bana diya
Zuhd aur itqaa pe mujhe apne naaz tha
Khud main ne tujh ko dushman-e-imaan bana diya
Aaina-e-jamaal ko dekhunga kis tarah
Us ne to pehle hi mujhe hairaan bana diya
Woh imtiyaaz-e-husn hai maani-o-lafz ka
Wahshat ko jis ne Ghalib-e-dauraan bana diya
شاعر کے بارے میں
وحشت رضا علی کلکتوی اردو کے ممتاز شاعر، ادیب، نقاد اور استادِ سخن تھے جن کا اصل نام سید رضا علی تھا جبکہ “وحشتؔ” ان کا تخلص تھا۔ وہ 18 نومبر 1881ء ...
مکمل تعارف پڑھیں