کوئی کیوں بے وفا ہے کیا کہئے

کوئی کیوں بے وفا ہے کیا کہئے
اپنی اپنی ادا ہے کیا کہئے
آپ کی کیا خطا ہے کیا کہئے
دل ستم آشنا ہے کیا کہئے
حسن ہنگامہ زا ہے کیا کہئے
عشق بے دست و پا ہے کیا کہئے
شوق ہنگامہ زا ہے کیا کہئے
ہر نفس مدعا ہے کیا کہئے
چارہ سازوں کا کچھ قصور نہیں
درد ہی لا دوا ہے کیا کہئے
قید ہستی سے چھوٹ تو جاتے
ہر ستم آسرا ہے کیا کہئے
حال ناشادؔ دیکھتے کیا ہو
یہ بھی شان خدا ہے کیا کہئے

ناشاد کانپوری