تبرک | Tabarruk – امیر امام

یہ میری زندگی بھی ایک مجلس ہےمحرم والی مجلس

یہ جاری ہےنہ جانے کب تلک جاری رہے گی

ابھی تک تو بڑی موٹی بیاضیں ہاتھ میں تھامے ہوئے دو چار نوحہ خوان باقی ہیںاک تو پہلے ہی بہت تاخیر اس میں ہو چکی تھی

وہ کافی دیر سے آئے تھےجن کو سوز پڑھنا تھا

سب اپنی اپنی باتیں کر رہے تھےمیں بھی اک کونے میں بیٹھا دیر تک سنتا رہا سب کی

وہ آئے سوز خوانی کیاور اس کے بعد مولانا نے بھی تقریر فرمائی

فضائل آئے تو میں نے بھی سب کے ساتھ میں نعرے لگائےمصائب آئے تو رویا

اور اب حلقے میں ماتم کر رہا ہوں میںشبیہیں قمقمے طغرے

عزا خانے میں چھائی ہر طرف لوبان کی خوشبومقدس ہیں بہت اچھے ہیں

لیکن کیوں کہ ماتم کر رہا ہوں میںتو میرے ہاتھ تھکتے جا رہے ہیں

میں دبلا پتلا لڑکا ہوںچلو میرا عقیدہ ہی بہت کمزور ہو گا

مگر میں چاہتا ہوںذرا سی دیر کو حلقے سے ہٹ کر ایک سگریٹ پھونک ہی آؤں

پر ایسا کر نہیں سکتا میںکیوں کہ بانیٔ مجلس عزا خانے کے دروازے پہ بیٹھا ہے

اور تبرک تو اسی کو بانٹنا ہےتو ماتم کر رہا ہوں میں

تو میں ماتم کروں گاچاہے کچھ ہو

کیوں کہ اب سب کے برابر ہی تبرک چاہیئے مجھ کو

— امیر امام