حضور شاہ میں اہل سخن کی آزمائش ہےچمن میں خوش نوایان چمن کی آزمائش ہے
قد و گیسو میں قیس و کوہ کن کی آزمائش ہےجہاں ہم ہیں وہاں دار و رسن کی آزمائش ہے
کریں گے کوہ کن کے حوصلے کا امتحان آخرابھی اس خستہ کے نیروے تن کی آزمائش ہے
نسیم مصر کو کیا پیر کنعاں کی ہوا خواہیاسے یوسف کی بوئے پیرہن کی آزمائش ہے
وہ آیا بزم میں دیکھو نہ کہیو پھر کہ غافل تھےشکیب و صبر اہل انجمن کی آزمائش ہے
رہے دل ہی میں تیر اچھا جگر کے پار ہو بہترغرض شست بت ناوک فگن کی آزمائش ہے
نہیں کچھ سبحہ و زنار کے پھندے میں گیرائیوفاداری میں شیخ و برہمن کی آزمائش ہے
پڑا رہ اے دل وابستہ بیتابی سے کیا حاصلمگر پھر تاب زلف پرشکن کی آزمائش ہے
رگ و پے میں جب اترے زہر غم تب دیکھیے کیا ہوابھی تو تلخیٔ کام و دہن کی آزمائش ہے
وہ آویں گے مرے گھر وعدہ کیسا دیکھنا غالبؔنئے فتنوں میں اب چرخ کہن کی آزمائش ہے
— مرزا غالب
Huzoor-e-Shah mein ahl-e-sukhan ki aazmaish haiChaman mein khush-nawayan-e-chaman ki aazmaish hai
Qad-o-gesu mein Qais-o-Kohkan ki aazmaish haiJahan hum hain wahan daar-o-rasan ki aazmaish hai
Karenge Kohkan ke hausle ka imtihan aakhirAbhi is khasta ke niroo-e-tan ki aazmaish hai
Naseem-e-Misr ko kya Pir-e-Kanaan ki hawa khwahiUse Yusuf ki boo-e-pairahan ki aazmaish hai
Wo aaya bazm mein dekho na kahiyo phir ke ghafil theShakib-o-sabr ahl-e-anjuman ki aazmaish hai
Rahe dil hi mein teer achha jigar ke paar ho behtarGharaz shast-e-but navak-fagan ki aazmaish hai
Nahin kuch subha-o-zunnar ke phande mein gehrayiWafadari mein shaikh-o-brahman ki aazmaish hai
Pada rah ae dil-e-wabasta betabi se kya hasilMagar phir taab-e-zulf-e-purshikan ki aazmaish hai
Rag-o-pay mein jab utre zehr-e-gham tab dekhiye kya hoAbhi to talkhi-e-kam-o-dahan ki aazmaish hai
Wo aayenge mere ghar waada kaisa dekhna GhalibؔNaye fitnon mein ab charkh-e-kuhan ki aazmaish hai