اشارے کیا نگۂ ناز دل ربا کے چلےستم کے تیر چلے نیمچے قضا کے چلے
گنہ کا بوجھ جو گردن پہ ہم اٹھا کے چلےخدا کے آگے خجالت سے سر جھکا کے چلے
طلب سے عار ہے اللہ سے فقیروں کوکہیں جو ہو گیا پھیرا صدا سنا کے چلے
پکارے کہتی تھی حسرت سے نعش عاشق کیصنم کدھر کو ہمیں خاک میں ملا کے چلے
مثال ماہیٔ بے آب موجیں تڑپا کیںحباب پھوٹ کے روئے جو تم نہا کے چلے
مقام یوں ہوا اس کارگاہ دنیا میںکہ جیسے دن کو مسافر سرا میں آ کے چلے
کسی کا دل نہ کیا ہم نے پائمال کبھیچلے جو راہ تو چیونٹی کو بھی بچا کے چلے
ملا جنہیں انہیں افتادگی سے اوج ملاانہیں نے کھائی ہے ٹھوکر جو سر اٹھا کے چلے
انیسؔ دم کا بھروسہ نہیں ٹھہر جاؤچراغ لے کے کہاں سامنے ہوا کے چلے
— میر انیس
Ishaare kyā nigah-e-nāz dil-rubā ke chaleSitam ke tīr chale nīmche qazā ke chale
Gunah kā bojh jo gardan pe hum uṭhā ke chaleKhuda ke āge khijālat se sar jhukā ke chale
Talab se 'ār hai Allāh se faqīroñ koKahīñ jo ho gayā pherā sadā sunā ke chale
Pukāre kahtī thī hasrat se na'sh-e-'āshiq kīSanam kidhar ko hameñ khāk meñ milā ke chale
Misāl-e-māhī-e-be-āb maujeñ taṛpā kīñHabāb phūṭ ke ro'e jo tum nahā ke chale
Maqām yūñ huā is kār-gāh-e-duniyā meñKe jaise din ko musāfir sarā meñ ā ke chale
Kisī kā dil na kiyā hum ne pā'emāl kabhīChale jo rāh to chīūnṭī ko bhī bachā ke chale
Milā jinheñ unhīñ iftādagī se auj milāUnhīñ ne khāī hai ṭhokar jo sar uṭhā ke chale
Anīs dam kā bharosa nahīñ ṭhahar jāoCharāgh le ke kahāñ sāmne havā ke chale