مسجد

Dur bargad ki ghani chhaon mein khamosh-o-maloolJis jagah raat ke tareek kafan ke neeche

Maazi-o-haal gunahgar namazi ki tarahApne aamaal pe ro lete hain chupke chupke

Ek veeran si masjid ka shikasta sa kalasPaas behti hui nadi ko taka karta hai

Aur tooti hui deewar pe chandool kabhiGeet pheeka sa koi chhed diya karta hai

Gard alood charaghon ko hawa ke jhonkeRoz mitti ki nai teh mein daba jaate hain

Aur jaate hue Sooraj ke wada'i anfaasRoshni aa ke darichon ki bujha jaate hain

Hasrat-e-sham-o-sahar baith ke gumbad ke qareebUn pareshan duaon ko suna karti hai

Jo tarasti hi rahin rang-e-asar ki khatirAur toota hua dil thaam liya karti hai

Ya ababeel koi aamad-e-sarma ke qareebIs ko maskan ke liye dhoond liya karti hai

Aur mehrab-e-shikasta mein simat kar pahronDastaan sard mumalik ki kaha karti hai

Ek boodha gadha deewar ke saaye mein kabhiOongh leta hai zara baith ke jaate jaate

Ya musafir koi aa jata hai wo bhi dar karEk lamhe ko thehar jata hai aate aate

Farsh jaaroob-kashi kya hai samajhta hi nahinKaal-adam ho gaya tasbeeh ke danon ka nizaam

Taaq mein shama ke aansoo hain abhi tak baqiAb musalla hai na mimbar na muazzin na imam

Aa chuke sahib-e-aflaak ke paigham-o-salaamKoh-o-dar ab na sunein ge wo sada-e-jibrael

Ab kisi kaaba ki shayad na pade gi bunyadKho gai dasht-e-faramoshi mein awaaz-e-khaleel

Chand pheeki si hansi hans ke guzar jata haiDaal dete hain sitare dhuli chadar apni

Is nigaar-e-dil-e-yazdaan ke janaze pe bas ekChashm-e-nam karti hai shabnam yahan aksar apni

Ek maila sa akela sa fasurda sa diyaRoz ra'asha zada hathon se kaha karta hai

Tum jalaate ho kabhi aa ke bujhaate bhi nahinEk jalta hai magar ek bujha karta hai

Tez nadi ki har ek mauj-e-talaatum-bardoshCheekh uthti hai wahin dur se faani faani

Kal baha loongi tujhe tod ke saahil ki quyoodAur phir gumbad-o-minar bhi paani paani